ສະຖາບັນ ເຕັກໂນໂລຊີ ສຸດສະກະ ເປັນສະຖາບັນການສຶກສາເຊິ່ງໄດ້ຮັບການສ້າງຕັ້ງຂຶ້ນໃນວັນທີ 2 ເດືອນທັນວາ ປີ 2002 ເຊິ່ງມີເປົ້າໝາຍເພື່ອຕອບສະໜອງໃຫ້ແກ່ການພັດທະນາຊັບພະຍາກອນມະນຸດໃນ ສ ປ ປ ລາວ ເຊິ່ງເປັນປັດໃຈສໍາຄັນໃຫ້ແກ່ການພັດທະນາເສດຖະກິດ - ສັງຄົມແຫ່ງຊາດ. ສະຖາບັນ ເຕັກໂນໂລຊີ ສຸດສະກະ ດຳເນີນກິດຈະການໂດຍອີງໃສ່ແນວຄວາມຄິດທີ່ບໍ່ຫວັງຜົນກຳໄລສູງສຸດ (ສະໜອງການສຶກສາທີ່ມີຄຸນນະພາບສູງໃຫ້ແກ່ມະຫາຊົນໃນ ຕົ້ນທຶນທີ່ສົມເຫດສົມຜົນ). ສະຖາບັນ ເຕັກໂນໂລຊີ ສຸດສະກະ ຕັ້ງຢູ່ຈຸດໃຈກາງຂອງນະຄອນຫຼວງວຽງຈັນ ສະດວກໃນການເດີນທາງໄປມາ. ສະຖາບັນ ເຕັກໂນໂລຊີ ສຸດສະກະ ໄດ້ຮັບການອະນຸຍາດຈາກກະຊວງສຶກສາທິການໃຫ້ດໍາເນີນການສິນສອນນັກສຶກສາໃນຫຼັກສູດຊັ້ນ ປະລິນຍາຕີ ແລະ ຊັ້ນສູງ ໃນສາຂາ ການບໍລິຫານທຸລະກິດ, ການບັນຊີ, ນິເທດສາດ ແລະ ວິທະຍາສາດຄອມພິວເຕີ້.

ພາສາລາວແມ່ນພາສາທີ່ໃຊ້ໃນການສິດສອນ ແລະ ການບໍລິຫານຂອງສະຖາບັນພວກເຮົາ. ເຖິງຢ່າງໃດກໍຕາມ, ນັກສຶກສາທີ່ບໍ່ຮູ້ພາສາລາວ ຫຼື ມີຄວາມຊຳນານດ້ານພາສາອັງກິດ ສາມາດເຂົ້າຮຽນໃນຫຼັກສູດທີ່ສອນໂດຍໃຊ້ພາສາອັງກິດ.

ສະຖາບັນ ເຕັກໂນໂລຊີ ສຸດສະກະ ແມ່ນບອນທໍາອິດ ທີ່ໄດ້ຮັບການຮັບຮອງຈາກອົງການສອບເສັງທຽບລະດັບພາສາອັງກິດຂອງ ສະຫະລັດອາເມລິກາ ໃຫ້ດໍາເນີນການສອບເສັງທຽບລະດັບພາສາອັງກິດ TOEFL® iBT ໃນ ສ ປ ປ ລາວ ໃນເດືອນ 7 ປີ 2006 ແລະ ໄດ້ຈັດການສອບ ເສັງຄັ້ງທໍາອິດໃນ ສ ປ ປ ລາວ ໃນເດືອນ 8 ປີ 2006.